Нам улууһугар муус устар 6 күнүгэр «На все 100 сдаем вместе» девизтээх Бүтүн Россиятааҕы “Төрөппүттэр БКЭ-ни туттарар биир күннэрэ” акция үрдүк тэрээһиннээхтик буолан ааста. Бу тэрээһиҥҥэ Нам улууһа 2017 сылтан көхтөөхтүк кыттар. Акция сүрүн сыалынан – оскуоланы бүтэрээччигэ көмөлөһүү, төрөппүккэ уонна общественноска экзамен хайдах тэриллэн барарын билиһиннэрии буолар. Бу күн төрөппүттэр уонна ыҥырыылаах ыалдьыттар Хатырык, Хатыҥ Арыы, I Хомустаах, Көбөкөн оскуолаларын базаларыгар тэриллибит экзамен туттарар пууннарга математикаҕа (базовай таһым) биир кэлим экзамены туттарыыга тургутук аастылар. Коронавируснай инфекция тарҕаныытын тохтотор үлэлэр салгыы баралларынан, бары санитарнай ирдэбиллэр тутуһулуннулар. Төрөппүттэр оҕолоро БКЭ туттаралларыгар ханнык бэрэбиэркэни ааһалларын илэ харахтарынан көрдүлэр. Ол курдук, металлоискатель нөҥүө аастылар, киирии ааҥҥа бэлиэтэннилэр, аудиторияҕа ыйыллыбыт сирдэргэ олордулар, оҕо үлэлиир усулуобуйата хайдах тэриллэрин, экзамен материаллара хайдах бэчээттэнэн тахсалларын билсистилэр, БКЭ тургутуктарыгар маарынныыр сорудахтары оҥорууга бэйэлэрин холонон көрдүлэр. Нам 2-с №-дээх оскуолатыгар экзамен күнүс 2 ч. 20 м. саҕаланна. Манна улуустааҕы гимназия, Нам 1-кы, 2-с –дээх оскуолаларын 16 төрөппүтэ уонна ыҥырыылаах ыалдьыттар: Нам улууһун үөрэҕин управлениетын начальнига Екатерина Ядреева, Нам улууһун дьаһалтатын дьыалаларын управляющайа Петр Сергучев, Ленскэй нэһилиэгин дьаһалтатын тутууга уонна ОДьКХ-ҕа сүрүннүүр специалиһа Афанасий Тарбахов тургутугу аастылар. Ийэлэр, аҕалар олус долгуйан туран, тэрээһиҥҥэ кытыннылар. Түмүктэр бу күн тахсаннар, кыттааччылар хас баалы ылбыттарын билэн тарҕастылар. Маннык акция төрөппүттэргэ да, үөрэнээччилэргэ да биир кэлим экзаментан олус долгуйбакка, бэйэ күүһүгэр эрэнэн, эппиэтинэстээхтик сыһыаннаһан бэлэмнэнэллэригэр көмөлөһөрө чахчы. Онуоха үөрэнээччи өй-санаа, уйулҕа өттүнэн бэлэмнээх буоларыгар төрөппүт көмөтө улахан оруоллаах